Poslovne vesti - Makedonija

Ламја ја јаде македонската економија!

Македонската економија 20 години се соочува со подеми и падови во растот на бруто-домашниот производ (БДП), производството, извозот, конкурентноста, следено со висока стапка на невработеност.

Ова беше генералниот заклучок на експертите и Стопанската комора на Македонија на вчерашната јавна расправа на тема "Време е за промена на досегашниот модел на економски развој", организирана од Капитал Медиа Груп и СКМ. Според Бранко Азески, претседател на СКМ, неопходно е заокружување на темелните принципи на пазарната економија преку загарантираната приватна сопственост, соодветен однос меѓу капиталот и трудот, како и ефикасна законска регулатива, судство и заштита на сопственост и договорите.

- Македонија помина низ многу тежок период како што се ембарга, воени конфликти, светска криза. Затоа треба да се оддаде признание што успеавме да ја задржиме економијата на вакво ниво - вели Азески во името на 10.000 компании кои се дел од СКМ, а кои остваруваат 80 проценти од додадената вредност на БДП и ангажираат 70 проценти од вкупните вработени. Азески вели дека приватниот сектор треба да стане главен стожер на економскиот раст на македонската економија и апсорбирање на невработеноста.

Според него, домашните и странските инвестиции треба да бидат двигатели на растот на економијата, а истовремено да се зголеми извозот на конкурентните производи.

- Земјата треба да се интегрира кон ЕУ, да го зголеми животниот стандард, да се модернизира инфраструктурата, како и да се намали енергетската зависност - укажува Азески.

За пратеникот Борис Стојменов, овие 20 години ламја го јаде македонското стопанство, оти економската политика постојано се базира на ММФ и Светската банка. За него, странските инвестиции се столб на македонската економија, но треба генерално да се промени моделот по кој се движи економијата.

- Ако економијата е пациент, дијагнозата е утврдена, но и терапијата, а болниот не се опоравува. Значи под итно треба да се смени лекот - укажува Стојменов. Според него, не се потребни шок-терапии, туку треба да се постигне консензус меѓу науката, експертите и политичарите.

Љупчо Зиков од Капитал Медие Груп вели дека економијата 20 години стагнира, а доказ за тоа е што престана да се генерираат нови компании, односно нема инвестиции од страна на големите компании. За него, светската економска криза е само дел од параметрите кои влијаеле на стагнацијата на македонската економија.

Ексгувернерот, Љубе Трпевски и предложи на Владата да се откаже годинава и идната 2011-година од дивидендата на Телекомот и овие средства да ги пренесе во докапитализација на Македонската банка за обнова и развој бидејќи смета дека на овој начин банката ќе се зајакне и со тоа ќе стане моќна и ќе го одржува македонското стопанство.

Стојмирка Тасевска од СКМ даде пример како можат да се поттикнат странски инвестиции во земјава. Според неа, неопходно е отворање на трговски центри во соседните земји во кои ќе се продаваат македонски производи.